ઈશુ પૂર્ણ ન હતા તેનું કારણ તેઓ પોતાના આદર્શ અનુસાર સંપૂર્ણ રીતે જીવ્યા નહિ અને ખાસ તો તેમણે સ્ત્રીને પુરુષની સમાન સ્થાન આપ્યું નહીં, તે હતું. સ્ત્રીઓએ તેમને માટે બધું જ કર્યું અને છતાં યહૂદી રિવાજોથી તેઓ એવા બદ્ધ હતા કે સ્ત્રીઓમાંથી એકેયને તેમણે સંત ન બનાવી. એમ છતાં ભગવાન બુદ્ધ પછીથી તેઓ મહાનમાં મહાન વિભૂતિ હતા. જો કે બુદ્ધ પોતે પણ સંપૂર્ણ રીતે પૂર્ણ ન હતા; છતાં તેમણે ધર્મમાં સ્ત્રીના હક્કનો સમાન કક્ષા પર સ્વીકાર કરેલો. તેમની પ્રથમ અને મહાન શિષ્યા તે તેમની પોતાની પત્ની હતી. તે ભારતની સ્ત્રીઓમાંની સમગ્ર બૌદ્ધ ધર્મ પ્રવૃત્તિની અધ્યક્ષા હતી.

પરંતુ આ મહાન આત્માઓની આપણે ટીકા ન કરવી જોઈએ. આપણાથી તેઓ ઘણા ઉચ્ચ છે. એ દૃષ્ટિથી આપણે તેમને જોવા જોઈએ. સાથોસાથ માણસ ગમે તેવો મહાન હોય, છતાં પણ કોઈ વ્યક્તિમાં આપણી શ્રદ્ધા ચોંટાડી નહિ રાખવી જોઈએ; આપણે પોતે પણ બુદ્ધ અને ઈશુ બનવું જોઈએ.

અંગ્રેજી શબ્દ (Heroic) બહાદુર માટેનો સંસ્કૃત શબ્દ ‘वीर’ તે અંગ્રેજી શબ્દ (Virtue) (સદ્ગુણ)નું મૂળ છે, કારણ કે પ્રાચીન કાળમાં ઉત્તમ યોદ્ધો મહાસદ્ગુણી લેખાતો.